ਨਿਰੰਕਾਰੀ ਸਤਿਗੁਰੂ ਦੀ ਹਜ਼ੂਰੀ ਵਿੱਚ ਹੋਇਆ ਸੰਤ ਸਮਾਗਮ
ਜੈਤੋ, ਸਰਹਿੰਦ (ਰੂਪ ਨਰੇਸ਼): ਨਿਰੰਕਾਰੀ ਸਤਿਗੁਰੂ ਮਾਤਾ ਸੁਦੀਕਸ਼ਾ ਜੀ ਮਹਾਰਾਜ ਨੇ ਐਤਵਾਰ ਸ਼ਾਮ ਮੁੰਬਈ ‘ਚ ਆਯੋਜਿਤ ਨਿਰੰਕਾਰੀ ਸੰਤ ਸਮਾਗਮ ‘ਚ ਹਾਜ਼ਰ ਸੰਗਤਾਂ ਨੂੰ ਸੰਬੋਧਨ ਕਰਦੇ ਹੋਏ ਫਰਮਾਇਆ ਕਿ ਸਾਡਾ ਸੱਭਿਆਚਾਰਕ, ਸਮਾਜਿਕ ਅਤੇ ਆਰਥਿਕ ਪਿਛੋਕੜ ਵੱਖ-ਵੱਖ ਹੋ ਸਕਦਾ ਹੈ, ਪਰ ਜਦੋਂ ਅਸੀਂ ਇਸ ਪਰਮਾਤਮਾ ਨੂੰ ਦੇਖਦੇ ਹਾਂ ਜੋ ਸਭ ਵਿੱਚ ਮੌਜੂਦ ਹੈ ਅਤੇ ਸਭ ਨੂੰ ਪਿਆਰ ਕਰਦਾ ਹੈ, ਤਾਂ ਅਸੀਂ ਆਸਾਨੀ ਨਾਲ ਏਕਤਾ ਦੇ ਧਾਗੇ ਵਿੱਚ ਬੱਝ ਜਾਂਦੇ ਹਾਂ। ਸਤਿਗੁਰੂ ਮਾਤਾ ਸੁਦੀਕਸ਼ਾ ਜੀ ਮਹਾਰਾਜ ਅਤੇ ਨਿਰੰਕਾਰੀ ਰਾਜਪਿਤਾ ਰਮਿਤ ਜੀ ਦੀ ਪਾਵਨ ਸਰਪ੍ਰਸਤੀ ਹੇਠ ਕਰਵਾਏ ਗਏ ਇਸ ਇੱਕ ਰੋਜ਼ਾ ਸੰਤ ਸਮਾਗਮ ਵਿੱਚ ਪੂਰੇ ਮੁੰਬਈ ਮਹਾਂਨਗਰ ਅਤੇ ਆਸ-ਪਾਸ ਦੇ ਇਲਾਕਿਆਂ ਵਿੱਚੋਂ ਹਜ਼ਾਰਾਂ ਦੀ ਗਿਣਤੀ ਵਿੱਚ ਸ਼ਰਧਾਲੂਆਂ ਅਤੇ ਨਗਰ ਨਿਵਾਸੀਆਂ ਨੇ ਆਪਣੀ ਹਾਜ਼ਰੀ ਭਰੀ। ਸਮੂਹ ਸੰਗਤਾਂ ਨੇ ਰੂਹਾਨੀ ਜੋੜੀ ਦੇ ਦਰਸ਼ਨ ਕੀਤੇ ਅਤੇ ਉਨ੍ਹਾਂ ਦੇ ਪਵਿੱਤਰ ਪ੍ਰਵਚਨਾਂ ਦਾ ਲਾਭ ਉਠਾਇਆ ਅਤੇ ਸਤਿਸੰਗ ਦਾ ਭਰਪੂਰ ਆਨੰਦ ਮਾਣਿਆ।
ਸਤਿਗੁਰੂ ਮਾਤਾ ਜੀ ਨੇ ਫੁੱਲਾਂ ਦੀ ਉਦਾਹਰਨ ਦੇ ਕੇ ਏਕਤਾ ਦੀ ਸੁੰਦਰ ਭਾਵਨਾ ਨੂੰ ਸਮਝਾਇਆ ਕਿ ਜਦੋਂ ਅਸੀਂ ਕਿਸੇ ਬਗੀਚੇ ਵਿੱਚ ਜਾਂਦੇ ਹਾਂ ਤਾਂ ਉੱਥੇ ਸਾਨੂੰ ਵੱਖ-ਵੱਖ ਕਿਸਮਾਂ ਦੇ ਫੁੱਲ ਦਿਖਾਈ ਦਿੰਦੇ ਹਨ। ਹਰ ਕਿਸੇ ਦੀ ਸ਼ਕਲ, ਰੰਗ ਅਤੇ ਗੰਧ ਵੱਖਰੀ ਹੁੰਦੀ ਹੈ। ਭਾਵੇਂ ਉਨ੍ਹਾਂ ਫੁੱਲਾਂ ਦੇ ਵੱਖੋ-ਵੱਖਰੇ ਗੁਣ ਹਨ, ਫਿਰ ਵੀ ਅਸੀਂ ਉਨ੍ਹਾਂ ਦੀ ਮਹਿਕ ਲੈਂਦੇ ਹਾਂ। ਇਸੇ ਤਰ੍ਹਾਂ ਜੇਕਰ ਅਸੀਂ ਮਨੁੱਖਾਂ ਪ੍ਰਤੀ ਇਹੀ ਭਾਵਨਾ ਰੱਖਦੇ ਹਾਂ ਕਿ ਹਰ ਕੋਈ ਪਰਮਾਤਮਾ ਦੀ ਰਚਨਾ ਹੈ, ਸਭ ਵਿੱਚ ਉਸ ਦਾ ਹੀ ਨੂਰ ਹੈ ਤਾਂ ਅਸੀਂ ਕਦੇ ਵੀ ਮਨ ਵਿਚ ਊਚ-ਨੀਚ ਦਾ ਫਰਕ ਨਹੀਂ ਦੇਖਾਂਗੇ।
ਸਤਿਗੁਰੂ ਮਾਤਾ ਜੀ ਨੇ ਸੰਤੁਲਿਤ ਜੀਵਨ ਜਿਊਣ ਦਾ ਤਰੀਕਾ ਦੱਸਦਿਆਂ ਕਿਹਾ ਕਿ ਸਾਨੂੰ ਭਗਤੀ ਦਾ ਮਾਰਗ ਅਪਣਾਉਣਾ ਪਵੇਗਾ। ਜੇਕਰ ਅਸੀਂ ਚੰਗੀਆਂ ਚੀਜ਼ਾਂ ਨੂੰ ਆਪਣੇ ਅੰਦਰ ਸ਼ਾਮਲ ਕਰੀਏ ਅਤੇ ਮਾੜੀਆਂ ਚੀਜ਼ਾਂ ਤੋਂ ਦੂਰ ਰਹੀਏ ਤਾਂ ਸਾਡੀ ਜ਼ਿੰਦਗੀ ਜ਼ਰੂਰ ਸੁਧਰ ਜਾਵੇਗੀ। ਅਸੀਂ ਆਪਣੇ ਅੰਦਰ ਮਨੁੱਖੀ ਗੁਣਾਂ ਨੂੰ ਇਸ ਤਰ੍ਹਾਂ ਵਿਕਸਿਤ ਕਰਨਾ ਹੈ ਕਿ ਉਹ ਸਾਡੇ ਵਿਹਾਰ ਅਤੇ ਆਚਰਣ ਵਿੱਚ ਹਰ ਸਮੇਂ ਦਿਖਾਈ ਦੇਣ ਕਿਉਂਕਿ ਜਦੋਂ ਸਾਡੇ ਚਰਿੱਤਰ ਵਿੱਚ ਪਿਆਰ, ਦਇਆ, ਮਿਠਾਸ ਅਤੇ ਮਹਾਨਤਾ ਵਰਗੇ ਦੈਵੀ ਗੁਣ ਹੋਣਗੇ ਤਾਂ ਕੋਈ ਸਾਡੇ ਨਾਲ ਭਾਵੇਂ ਜਿਹੋ ਜਿਹਾ ਵੀ ਵਿਵਹਾਰ ਕਰੇ, ਅਸੀਂ ਸਾਰਿਆਂ ਨਾਲ ਹੀ ਚੰਗਾ ਵਿਹਾਰ ਕਰਾਂਗੇ ।
ਆਪਣੇ ਸੰਬੋਧਨ ਵਿੱਚ ਨਿਰੰਕਾਰੀ ਰਾਜਪਿਤਾ ਜੀ ਨੇ ਪੂਰਨ ਸਤਿਗੁਰੂ ਦੀ ਮਹੱਤਤਾ ਦੱਸਦਿਆਂ ਕਿਹਾ ਕਿ ਜਦੋਂ ਤੱਕ ਸਾਡੇ ਜੀਵਨ ਵਿੱਚ ਪੂਰਨ ਸਤਿਗੁਰੂ ਨਹੀਂ ਆਉਂਦਾ, ਸਾਨੂੰ ਸੱਚ ਦਾ ਅਹਿਸਾਸ ਨਹੀਂ ਹੁੰਦਾ। ਸੱਚ ਦੀ ਅਣਹੋਂਦ ਵਿੱਚ ਅਸੀਂ ਭਰਮਾਂ ਦੇ ਸਹਾਰੇ ਸਾਰੀ ਉਮਰ ਗੁਜ਼ਾਰਦੇ ਹਾਂ। ਮਾਇਆ ਤੋਂ ਪ੍ਰਭਾਵਿਤ ਹੋ ਕੇ ਸਾਡੇ ਮਨ ਵਿਚ ਇਹ ਵਿਸ਼ਵਾਸ ਪੈਦਾ ਹੋ ਜਾਂਦਾ ਹੈ ਕਿ ਅਮੀਰੀ ਨਾਲ ਭਰਪੂਰ ਜੀਵਨ ਜਿਊਣਾ ਹੀ ਅਸਲ ਜੀਵਨ ਹੈ ਅਤੇ ਇਹੀ ਸਾਡਾ ਅੰਤਮ ਟੀਚਾ ਹੈ, ਪਰ ਸੱਚਾਈ ਇਹ ਹੈ ਕਿ ਮਾਇਆ, ਜਿਸ ਨੂੰ ਮਨੁੱਖ ਨੇ ਸਭ ਕੁਝ ਮੰਨ ਲਿਆ ਹੈ, ਅਸਲ ਵਿਚ ਇਕ ਪਲ ਦਾ ਸੁਖ ਹੈ। ਸਤਿਗੁਰੂ ਸਾਨੂੰ ਅਨਾਦਿ, ਸਥਿਰ ਪਰਮਾਤਮਾ ਦਾ ਅਹਿਸਾਸ ਕਰਵਾ ਕੇ ਇਹ ਸਮਝਾਉਣ ਦੀ ਕੋਸ਼ਿਸ਼ ਕਰਦੇ ਹਨ ਕਿ ਪਰਮਾਤਮਾ ਨੂੰ ਜਾਣਨਾ ਅਤੇ ਉਸ ਨਾਲ ਇਕਮਿਕ ਹੋਣਾ ਸਾਡੇ ਜੀਵਨ ਦਾ ਅੰਤਮ ਟੀਚਾ ਹੈ, ਤਾਂ ਹੀ ਅਸੀਂ ਸੱਚੇ ਮਨੁੱਖ ਬਣ ਸਕਦੇ ਹਾਂ।
ਮੈਂਬਰ ਇੰਚਾਰਜ ਪ੍ਰਚਾਰ ਪਸਾਰ ਸਤਿਕਾਰਯੋਗ ਸ਼੍ਰੀ ਮੋਹਨ ਛਾਬੜਾ ਨੇ ਸਤਿਗੁਰੂ ਮਾਤਾ ਜੀ ਅਤੇ ਨਿਰੰਕਾਰੀ ਰਾਜਪਿਤਾ ਜੀ ਦਾ ਸਾਰੇ ਸੰਤਾਂ ਨੂੰ ਪਵਿੱਤਰ ਅਸ਼ੀਰਵਾਦ ਦੇਣ ਲਈ ਧੰਨਵਾਦ ਕੀਤਾ ਅਤੇ ਪ੍ਰਸ਼ਾਸਨ ਦੇ ਸ਼ਲਾਘਾਯੋਗ ਸਹਿਯੋਗ ਲਈ ਵੀ ਧੰਨਵਾਦ ਕੀਤਾ। ਇਸ ਵਿਸ਼ਾਲ ਸੰਤ ਸਮਾਗਮ ਵਿੱਚ ਭਾਰਤ ਸਰਕਾਰ ਦੀ ਮਹਿਲਾ ਅਤੇ ਬਾਲ ਵਿਕਾਸ ਮੰਤਰੀ ਮਾਨਯੋਗ ਅਦਿਤੀ ਤਤਕਰੇ, ਵਿਧਾਇਕ ਪ੍ਰਤਾਪ ਸਰਨਾਇਕ ਅਤੇ ਵਿਧਾਇਕਾ ਸ਼੍ਰੀਮਤੀ ਗੀਤਾ ਜੈਨ ਸਮੇਤ ਕਈ ਪਤਵੰਤੇ ਸੱਜਣਾਂ ਨੇ ਸ਼ਿਰਕਤ ਕੀਤੀ ਅਤੇ ਰੂਹਾਨੀ ਜੋੜੀ ਦਾ ਆਸ਼ੀਰਵਾਦ ਪ੍ਰਾਪਤ ਕੀਤਾ। ਬਿਨਾਂ ਸ਼ੱਕ, ਇਹ ਪਵਿੱਤਰ ਸੰਤ ਸਮਾਗਮ ਸਭ ਲਈ ਪ੍ਰੇਰਨਾਦਾਇਕ ਸੀ, ਏਕਤਾ ਦੀ ਸੁੰਦਰ ਭਾਵਨਾ ਨੂੰ ਦਰਸਾਉਂਦਾ ਸੀ।
