ਨਵੀਂ ਦਿੱਲੀ, 18 ਦਸੰਬਰ (ਨਿਊਜ਼ ਟਾਊਨ ਨੈਟਵਰਕ) : ਭਾਰਤ ਅਤੇ ਦੱਖਣੀ ਅਫ਼ਰੀਕਾ ਦਰਮਿਆਨ ਖੇਡਿਆ ਜਾਣ ਵਾਲਾ ਚੌਥਾ ਟੀ-20 ਮੈਚ ਬੀਤੀ ਰਾਤ ਰੱਦ ਹੋ ਗਿਆ ਪਰ ਇਸ ਮੈਚ ਨੂੰ ਦੇਖਣ ਲਈ ਲਈ ਇਕ ਕ੍ਰਿਕਟ ਪ੍ਰੇਮੀ ਨੇ ਕਣਕ ਵੇਚ ਕੇ ਟਿਕਟ ਖ਼ਰੀਦੀ ਸੀ ਜਦਕਿ ਇਕ ਕ੍ਰਿਕਟ ਪ੍ਰੇਮੀ ਨੇਪਾਲ ਤੋਂ ਲਖਨਊ ਸਿਰਫ਼ ਮੈਚ ਵੇਖਣ ਆਇਆ ਸੀ ਪਰ ਸੰਘਣੀ ਧੁੰਦ ਕਾਰਨ ਮੈਚ ਰੱਦ ਹੋ ਗਿਆ। ਨਿਰਾਸ਼ ਕ੍ਰਿਕਟ ਪ੍ਰੇਮੀਆਂ ਨੇ ਟਿਕਟ ਦੇ ਪੈਸੇ ਮੰਗਣੇ ਸ਼ੁਰੂ ਕਰ ਦਿਤੇ ਸਨ ਪਰ ਹੁਣ ਬੀ.ਸੀ.ਸੀ.ਆਈ. ਉਨ੍ਹਾਂ ਦੇ ਪੈਸੇ ਵਾਪਸ ਕਰੇਗੀ। ਭਾਰਤ ਅਤੇ ਸਾਊਥ ਅਫਰੀਕਾ ਵਿਚਾਲੇ 17 ਦਸੰਬਰ ਨੂੰ ਲਖਨਊ ਦੇ ਇਕਾਨਾ ਕ੍ਰਿਕਟ ਸਟੇਡੀਅਮ ਵਿਚ ਚੌਥਾ ਟੀ-20 ਮੈਚ ਖੇਡਿਆ ਜਾਣਾ ਸੀ। ਸ਼ਹਿਰ ਵਿਚ ਸ਼ਾਮ ਤੋਂ ਹੀ ਧੁੰਦ ਸੀ ਪਰ ਇਸ ਦੇ ਬਾਵਜੂਦ ਹਜ਼ਾਰਾਂ ਦਰਸ਼ਕ ਸਟੇਡੀਅਮ ਪਹੁੰਚ ਗਏ। ਹਾਲਾਂਕਿ ਮੈਚ ਵਿਚ ਟਾਸ ਤਕ ਨਹੀਂ ਹੋ ਸਕਿਆ। ਅੰਪਾਇਰਾਂ ਨੇ ਛੇ ਵਾਰ ਮੈਦਾਨ ਦਾ ਮੁਆਇਨਾ ਕੀਤਾ। ਆਖ਼ਰ ਵਿਚ ਫ਼ੈਸਲਾ ਹੋਇਆ ਕਿ ਘੱਟ ਵਿਜੀਬਿਲਟੀ ਹੋਣ ਕਰਕੇ ਮੈਚ ਨਹੀਂ ਹੋ ਸਕਦਾ। ਇਸ ਲਈ ਦਰਸ਼ਕਾਂ ਨੂੰ ਬਿਨਾਂ ਮੈਚ ਵੇਖੇ ਹੀ ਵਾਪਸ ਮੁੜਨਾ ਪਿਆ। ਸਾਰੇ ਅੰਤਰਰਾਸ਼ਟਰੀ ਮੈਚਾਂ ਦਾ ਇੰਸ਼ੋਰੈਂਸ ਹੁੰਦਾ ਹੈ ਜੋ ਆਯੋਜਨ ਕਰਵਾਉਣ ਵਾਲੀ ਸੂਬਾ ਕ੍ਰਿਕਟ ਐਸੋਸੀਏਸ਼ਨ ਕਰਵਾਉਂਦੀ ਹੈ। ਨਿਯਮ ਅਨੁਸਾਰ ਜੇ ਮੈਚ ਵਿਚ ਇਕ ਵੀ ਗੇਂਦ ਪਾਈ ਜਾਂਦੀ ਤਾਂ ਪੈਸਾ ਵਾਪਸ ਨਹੀਂ ਮਿਲਦਾ। ਭਾਰਤ-ਦੱਖਣੀ ਅਫ਼ਰੀਕਾ ਚੌਥੇ ਟੀ-20 ਮੈਚ ਵਿਚ ਟਾਸ ਤਕ ਨਹੀਂ ਹੋਇਆ। ਇਸ ਲਈ ਯੂ.ਪੀ. ਕ੍ਰਿਕਟ ਐਸੋਸੀਏਸ਼ਨ ਇੰਸ਼ੋਰੈਂਸ ਕੰਪਨੀ ਤੋਂ ਕਲੇਮ ਕਰੇਗੀ।
——————————
This news is auto published from an agency/source and may be published as received.
