ਨੁਰਪੁਰਬੇਦੀ/ਰੂਪਨਗਰ, 8 ਦਸੰਬਰ : ਰੂਪਨਗਰ ਦੇ ਭੁਲੇ-ਬਿਸਰੇ ਇਤਿਹਾਸ ਨੂੰ 80 ਸਾਲ ਬਾਅਦ ਨਵੀਂ ਪਹਿਚਾਣ ਮਿਲਣ ਜਾ ਰਹੀ ਹੈ। ਪਿੰਡ ਮੀਰਪੁਰ ਵਿੱਚ ਉਹ ਇਤਿਹਾਸਿਕ ਯਾਦਗਾਰ ਬਣ ਰਹੀ ਹੈ, ਜੋ ਰੂਪਨਗਰ ਦੇ ਕਰੀਬ ਪੰਜਾਹ ਗੁਮਨਾਮ ਸ਼ਹੀਦਾਂ ਦੀ ਵਿਰਾਸਤ ਨੂੰ ਮੁੜ ਜਗਾਉਣ ਲਈ ਸਮਰਪਿਤ ਹੈ। ਇਹ ਉਹ ਯੋਧੇ ਸਨ, ਜਿਨ੍ਹਾਂ ਨੇ ਗਦਰ ਲਹਿਰ, ਜੈਤੋ ਮੋਰਚਾ, ਗੁਰੂ ਕੇ ਬਾਗ ਅੰਦੋਲਨ ਅਤੇ ਆਜ਼ਾਦ ਹਿੰਦ ਫੌਜ ਦੀ ਲੜਾਈ ਵਿੱਚ ਆਪਣਾ ਯੋਗਦਾਨ ਪਾਇਆ, ਪਰ ਇਤਿਹਾਸ ਦੇ ਰਸਮੀ ਪੰਨਿਆਂ ਤੋਂ ਗਾਇਬ ਰਹੇ। ਹੁਣ ਪਿੰਡ ਮੀਰਪੁਰ ਵਿੱਚ ਗਦਰੀ ਬਾਬਾ ਕਿਰਪਾ ਸਿੰਘ ਸ਼ਹੀਦ ਯਾਦਗਾਰ ਅਤੇ ਮਿਊਜ਼ੀਅਮ ਬਨਾਇਆ ਜਾ ਰਿਹਾ ਹੈ। ਬਾਬਾ ਕਿਰਪਾ ਸਿੰਘ ਦੇ ਪਰਿਵਾਰ ਨੇ ਮਿਊਜ਼ੀਅਮ ਦੀ ਉਸਾਰੀ ਲਈ ਪਿੰਡ ਦੇ ਮੁੱਖ ਮਾਰਗ ‘ਤੇ ਇੱਕ ਕਨਾਲ ਕੀਮਤੀ ਜਮੀਨ ਦਾਨ ਕੀਤੀ ਹੈ, ਜਿਸਦੀ ਕੀਮਤ ਕਰੀਬ ਪੰਜਾਹ ਲੱਖ ਰੁਪਏ ਦੱਸੀ ਜਾ ਰਹੀ ਹੈ। ਨਿਰਮਾਣ ਕਾਰਜ ਦੀ ਸ਼ੁਰੂਆਤ ਗਦਰੀ ਬਾਬਾ ਕਿਰਪਾ ਸਿੰਘ ਯਾਦਗਾਰ ਸੁਸਾਇਟੀ ਵੱਲੋਂ ਅਰਦਾਸ ਨਾਲ ਕੀਤੀ ਗਈ ਅਤੇ ਟੱਕ ਲਗਾ ਕੇ ਮਿਊਜ਼ੀਅਮ ਦੇ ਪਹਿਲੇ ਚਰਣ ਨੂੰ ਸ਼ੁਰੂ ਕੀਤਾ ਗਿਆ। ਇਹ ਯਾਦਗਾਰ ਸਿਰਫ਼ ਇੱਕ ਸਮਾਰਕ ਨਹੀਂ, ਸਗੋਂ ਰੂਪਨਗਰ ਦੇ ਭੁਲੇ ਹੋਏ ਸ਼ਹੀਦਾਂ ਨੂੰ ਮੁੜ ਇਤਿਹਾਸ ਵਿੱਚ ਜਗ੍ਹਾ ਦੇਣ ਦੀ ਇਕ ਵੱਡੀ ਮੁਹਿੰਮ ਹੈ। ਮਿਊਜ਼ੀਅਮ ਨੂੰ ਤਿੰਨ ਭਾਗਾਂ ਵਿੱਚ ਤਿਆਰ ਕੀਤਾ ਜਾਵੇਗਾ ਜਿਸ ਵਿੱਚ ਸ਼ਹੀਦ ਗੈਲਰੀ, ਗਦਰ ਮੂਵਮੈਂਟ ਸੈਂਟਰ,ਅਤੇ ਖੁੱਲ੍ਹਾ ਸਟੇਜ, ਜਿੱਥੇ ਨੌਜਵਾਨਾਂ ਲਈ ਇਤਿਹਾਸਕ ਅਤੇ ਸਭਿਆਚਾਰਕ ਪ੍ਰੋਗਰਾਮ ਕਰਵਾਏ ਜਾਣਗੇ, ਬਣਾਏ ਜਾ ਰਹੇ ਹਨ। ਪਹਿਲੇ ਚਰਣ ਦੀ ਲਾਗਤ 30 ਤੋਂ 35 ਲੱਖ ਰੁਪਏ ਅੰਦਾਜ਼ਿਤ ਹੈ, ਜਦਕਿ ਪੂਰੇ ਪ੍ਰੋਜੈਕਟ ਦੀ ਲਾਗਤ 80 ਲੱਖ ਤੋਂ ਇੱਕ ਕਰੋੜ ਰੁਪਏ ਤੱਕ ਹੋ ਸਕਦੀ ਹੈ। ਸੁਸਾਇਟੀ ਦੇ ਅਨੁਸਾਰ ਇਹ ਯਾਦਗਾਰ ਆਉਣ ਵਾਲੀਆਂ ਪੀੜ੍ਹੀਆਂ ਨੂੰ ਇਹ ਸਮਝਾਉਣ ਦਾ ਕੇਂਦਰ ਬਣੇਗੀ ਕਿ ਰੂਪਨਗਰ ਦੀ ਧਰਤੀ ਨੇ ਵੀ ਆਜ਼ਾਦੀ ਲਈ ਕਿੰਨੇ ਮੁਕੱਦਰਮੰਦ ਯੋਧੇ ਪੈਦਾ ਕੀਤੇ, ਜਿਨ੍ਹਾਂ ਨੂੰ ਹੁਣ ਉਹ ਮਾਣ ਮਿਲੇਗਾ ਜਿਨ੍ਹਾਂ ਦੇ ਉਹ ਹੱਕਦਾਰ ਸਨ।
——————————
This news is auto published from an agency/source and may be published as received.
